ភ្នំពេញ៖ ក្នុងរយៈពេល ៧ខែឆ្នាំ២០២៣នេះ ករណីរន្ទះបាញ់បានកើតឡើងចំនួន ១០០លើក បណ្តាលឱ្យមនុស្សចំនួន ៥៩នាក់បានស្លាប់ និងរបួស៤៥។ ជាមួយគ្នានេះដែរក៏ងាប់គោក្របីចំនួន ៨៧ក្បាល។ ក្នុងករណីរន្ទះបាញ់នេះបានបណ្តាលឱ្យខូចខាតផ្ទះចំនួន ៧ខ្នង។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ។
បើយោងតាមរបាយការណ៍ដដែល ក្នុងរយៈពេល ៧ខែឆ្នាំនេះផងដែរ ករណីខ្យល់កន្ត្រាក់ក៏បានកើតឡើងចំនួន ២២១លើក ធ្វើឱ្យរលំផ្ទះចំនួន ១ ៨៨០ខ្នង ផ្ទះរបើកចំនួន ១២ ២០៨ខ្នង សាលារៀន ៨៧ខ្នង តូបចំនួន ៧៧អគាររដ្ឋបាលចំនួន ៣៨កន្លែង និងស្លាប់មនុស្សចំនួន ៨នាក់ និងរបួស ១៤៥នាក់។
ក្រសួងធនធានទឹក និងឧតុនិយម បានអំពាវនាវពលរដ្ឋបង្កើនការប្រុងប្រយ័ត្នចំពោះបាតុភូតធម្មជាតិដែលអាចកើតមានឡើងជាយថាហេតុ ខណៈនៅតំបន់ទំនាបកណ្តាល តំបន់ខ្ពង់រាប និងតំបន់មាត់សមុទ្រ នឹងមានភ្លៀងធ្លាក់ លាយឡំផ្គរ រន្ទះ និងខ្យល់កន្ត្រាក់នៅសប្តាហ៍ខាងមុខនេះ។ ចំពោះនៅលើផ្ទៃសមុទ្រ អាចមានបក់បោកខ្លាំង ហើយរលកសមុទ្រមានកម្ពស់ខ្ពស់។
ជាមួយគ្នានេះនៅតាមទឹកទន្លេមេគង្គ នឹងហក់ឡើងក្នុងរយៈពេល ៣ ទៅ ៤ថ្ងៃ ខាងមុខនេះ ជាពិសេសនៅភាគខាងលើនៃប្រទេសកម្ពុជា មានខេត្តស្ទឹងត្រែង ទឹកអាចនឹងឡើងដល់កម្ពស់ ៧,៦៥ម៉ែត្រ ខេត្តក្រចេះ ទឹកនឹងអាចឡើងដល់កម្ពស់ ១៦,៧០ម៉ែត្រ ហើយខេត្តកំពង់ចាម ទឹកនឹងអាចឡើងដល់កម្ពស់ ៩,៩០ម៉ែត្រ៕
